أصحابي والحب

هم اصدقائي المقربون جدا ولكن لا مانع من معرفة اخبارهم واستقصائها , ربما من باب التخليد لذكرى ستدوم او لا تدوم أو من باب شر البلية ما يضحك , ربما أيضا من باب جعلهم يندمون بشدة على اخباري بكل هذه الاخبار , عموما ننتظر لنر معا ما ستسفر عنه الايام فربما تسفر الايام عن " عدم قدرتي على كتابة البوست القادم أو أي بوست آخر" .

لذلك دعونا نبدأ ولتدعوا الله لي بالسلامة

عبدالرحمن بيحب بنت الجيران بقالهم حوالي 5 سنين , كل يوم بالليل يفضلوا واقفين فى البلكونات يبصوا لبعض ويكلموا بعض بالاشارات والذي منه
الواد بياخد الأجازة عشان يقف في البلكونة كل ليلة ييجي سبع ساعات , لا بياكل ولا بيخرج معانا , الله يخيبه , محدش واخد منها حاجة


سعيد كان عاوز يخس سبعة كيلو ومش عارف, بقاله 3 سنين وهو ثابت على الوزن ده
ساعة أما حبيبته قطعت معاه , اتعقد ودعى عليها وعلى امثالها , بس هوب , خس 8 كيلو

و دلوقتي بيدعيلها , حاليا هو بيدور على بنتين كمان يحبهم ويسيبهم مادام كل واحدة بتعمل معاه 8 كيلو

أمجد بقى بيتعرف على البنات بسرعة خرافية وللصراحة بيكون هدفه انه يخطبهم ويتجوزهم
بس سبحان الله كل علاقاته تنتهي بكلمة واحدة هي" احنا
مش هينفع نكمل مع بعض يا أمجد .... انت بتاع بنات وأنا مش واثقة فيك "
مفيش داعي أقول انه اتعقد تماما


عمرو بقى حكايته حكايه
الواد حب واحدة زي القمر , الشارع كله كان بيجري وراها
أتاني في يوم وقال لي " البنات أغبى كائنات فى العالم "
طبعا انا ضده ومع سعاد حسني أن البنات ألطف الكائنات ولكن نعود لعمرو
ليه
ياسيدي صاحبات ريم " الجو بتاعه " اتصلوا بيها وقالولها عمرو كان يعرف خمس بنات قبلك والواد ده بتاع بنات سيبك منه وانت عارف طبعا ان دى اول واحد اعرفها
قلت " طبعا " فقد كانت هى الحقيقة
قال " ودار بيننا هذا الحوار "

انت كنت تعرف خمس بنات قبلي ؟؟
لا طبعا انتي اول واحدة فى حياتي
عمرو أنا مش هزعل , بالعكس هفرح إنك سبتهم عشاني
انتي غبية ولا ايه؟؟؟
ياعمرو قول وأنا هفضل أحبك برضه
يابنتي والله دا أنا عويل ده انا عرفتك انتي بالعافيه

وطبعا البنت اتخطبت لواحد تاني واتجوزوا بسبب كلام صاحباتها
ولذلك عدلت عن رأي سعاد حسني وتبنيت رأي عمرو



اتنين مفيش داعي لذكر اسمهم , بيحبوا بعض وهما عارفين انهم بيحبوا بعض ,بس الاتنين عندهم برستيج عالي,محدش فيهم راضي يفاتح التاني, فقاعدين يبصوا لبعض ويضحكوا لبعض من سبع سنين
يا عم دى عالم فاضية , ياتهم نيلة


قال لي سيف:
ياعم ما تحبش واحدة بس , حب تلاتة زيي كدة , عشان لما واحدة تخنق عليك تروق مع الأتنين التانيين
قلت وانا فى قمة الغيظ : يا عم هو أنا لاقى واحدة أصلا ؟؟؟


معلش يا محمد مش هينفع
ليه مش هينفع ؟؟
علشان هو مش هينفع
هو ايه اللى مش هينفع ؟؟
هو مش هينفع
الكلام اللى دايما يتقال لمحمد كل نهاية علاقة حب


صابر بقى مستمتع جدا بالممثلات , وكل أما واحدة تعجبه فى الجامعة يروح يبص على الصور اللى عنده ويتف على الحريم كلهم , بس بصراحة عنده شوية صور يتوبوا الواحد عن البص للبنات فى الشوارع


أحمد بقى نحس
هو بنفسه عارف كدة, الواد كل اما يعجب بواحدة تتخطب بعدها بيومين أو تكون اتخطبت من أسبوع أصلا, عادى

جه يحب آخر واحدة طلعت بنت صاحب أكبر شركات المنطقة كلها, طبعا صرف نظر
يا جدعان بقولكوا والله العظيم الواد ده نحس


مهاد بيقولي " نفسي واحدة تفكر تجوزني بنتها , اشمعنى أنا يعني؟؟ كل واحد يقعد يحكيلي ان فلانة حاجزاه لبنتها وعلانة راسمة عليه , طب اشمعنى أنا يعنى؟؟؟ "
والله مش عارف اقوله ايه غير إن أنا كمان كدة وأكتر من كدة


رشدي بقى شغال تمام مع المعلم , الواد والبت مفيش حاجة بتعطلهم أبدا , اروح أقعد معاه , يادوب ربع ساعة والمعلم يتصل , طبعا مفيش داعي أقول انى بكمل قعدة مع الكمبيوتر
واضح إن المعلم بتاعه بيبقى علي نار الفترة اللى بيسيبوا فيها سماعة التليفون اللى هى ساعتين فى اليوم بس

يا جماعة نفسي فى معلم زي المعلم بتاعه كدة


حوار بين اتنين صحابي
واد يا باز كان فيه حتة بنت النهاردة أحلى من القمر نفسه
الباز بغيظ" ولا.... انت لا تؤمن على اعراض النساء "
ايه يا عم هو أنا قلتلك انا شفت رقاصة النهاردة ده انت عيل خنقة


أنا مش فارق معايا كل بنات العالم , كل اللى انا عاوزه منهم واحدة بس.... بس تبقى حبيبتي
ياسيدى على الجمال


ازيك يا مرسي, انت فين يابنى؟؟
معلش يا دكتور , اصل عندي فرصه شغل فى ايطاليا أو الامارات ومحتار بينهم
يابنى روح ايطاليا واخلص
بس أنا خايف على نفسى ابوظ وانت عارف اوروبا
عارف , خلاص روح الإمارات وربنا يوفقك
ممكن , الاسبوع اللى فات دخت لف على السفارات وبعدين يوم الاتنين معرفتش اجيلك اصلى كنت نايم مع واحدة كدة من ......
اسكت الله يخرب بيتك ... امال هتبوظ ايه فى اوروبا ؟؟؟
لا ما أنت عارف الناس دى مقرفة وبيبقى عندهم الايدز وحاجات تانية وأنا خايف من ربنا
يعنى يا واطى قاعد هنا تبوظ فى حريمنا وبتحافظ على حريم ايطاليا

طبعا .... لا تعليق على مرسي ... بس بجد الواد ده طيب



محمود كل أما يعرف واحدة من النت ,يتفقوا يخرجوا مع بعض , يعرف بعد مقابلتين تلاتة ان عندها من 28 الى 36 سنة
الواد بيحلفلى انهم مش باين عليهم , شكلهم كلهم من 20 الى 22 سنة
محمود خلاص بطل يعرف بنات أصلا



واحد تانى بقى علاقاته كلها مع بنات من 30 الى 40 سنة وعنده مبدأ إن البنات الصغيرين تافهين وطلباتهم كتير ومفيش فرق بينهم وبين الكتاكيت
طبعا ده رأيه هو وأنا عكسه تماما زى ما أنتم عارفين ... رديت عليه " خليك فى دار المسنين اللى انت فاتحها دى"



خالد صوته حلو جدا وللصدفه سارة كمان صوتها حلو جدا
فالمكالمة بتبقى كلها أغانى وآهات وأنا قاعد أسمع زى البتاع
الله يحرقكوا


سامي بيقنع البنات انه بيحبهم علشان الهدايا والموبايلات والدباديب
واضح ان فيه ناس دماغهم فاضيه كتير

وواضح برضه ان الواطى واطى


سيد بقى كان بيحب واحدة من سنتين , بس تقريبا نسي انه كان بيحبها , اصله كل متعته فى الحياة النوم .... لا طبعا مش النوم مع الحريم ... النوم لوحده ... ياخد الاجازة عشان ينام ...
سيد لما بيصحى كل سنتين بيفتكرني بالعافيه ... يبقى ازاى هيفتكر مشاعره ... التيس ده؟؟؟؟


ياما تحت السواهى دواهى
جملة بقولها عن مدحت ... وهسكت وهو عارف ليه؟؟؟



احدى الصديقات تقول لرامي بعد انتهاء علاقته بدينا
رامي ...لو سمحت امسح رقم دينا
رامي وهو يهم بمسح الرقم :: لا مش همسحه
دينا قالت :: لو ما مسحتوش هتقول لعمر أخوها
رامي بغيظ:: طب والله ما أنا ماسحه وما تخلينيش أروح أضرب دينا هى وأمها وأخوها بالجزمة دلوقتي

تعليق مني:: ياواد يا جامد ... فعلا الحب ممكن يتقلب فى لحظة



عزت بيستحقر الحب والحبيبة واللى بيفكروا يحبوا ورأيه إن ده كله تضييع وقت, وهو بقى قاعد طول النهار والليل بيتفرج على افلام بورنو ومبدأه إن أى واحدة تسد, ما بيفرقوش عن بعض حاجة, يبقى ليه الحب بقى
مساء الجمال يا عزت

مصطفى ... أمه بتحكيله عن عن بنت واحدة صاحبتها ومن كتر الحكايات مصطفى حبها على الغيبن ... عمره ما شافها
اللى يغيظنى فى الحكاية انه بيحكيلي عنها وكأنها محبوبته الابدية .... وبيوعدنى انه هيتوب لما يخطبها...
طيب أما نشوف يا درش


قال لي فهمي::: انت لما بتكون جعان جدا ووالدتك تجيبلك أكل مش ولابد , طعميه مثلا بتعمل ايه ؟؟
قلت : باكله كله طبعا
فهمي::: طب وانت شبعان قوي هى بتعمل ايه عشان تأكلك؟؟
قلت : بتجيب أحسن أكل كباب مثلا وتتحايل عليا عشان أكله
فهمي::: هو إحنا كدة مع البنات , مش لاقيين وعشان كدة بنرضى بأى واحدة والسلام وتبقى دى بالنسبة لنا أحسن بنت فى الدنيا زى الطعمية يعني
قلت : ماليش فيها دي .... وحياة أمي حتى لو كنت هموت من الجوع مش هآكل إلا كباب وبس , هو أنا بذاكر واتبهدل عشان الطعمية

انت فاهمني طبعا يا فهمي


على هامش العيال الحبيبة::

كل القصص اللى فوق حقيقية تماما , ولكن غيرت الأسماء مع بعضها , عشان أنا مش بلطجي للدرجة دي

العيال لما شافوا البوست مصممين يضربوني , بس هحاول اقنعهم يسيبونى لبعد الامتحانات

انا غيرت اسم الباز مكان محمد لما قاللى انه ما بيهموش حاجة

اللى عنده قصة حب جميلة زي اللى فوق يبعتلي فى الكومنت , وأنا اكتبهاله هنا

طبعا , انا أحد هؤلاء الناس اللى فوق , ولكن انا مين؟؟؟

يلا , ونتقابل قريب قوي ان شاء الله